తిరుమల శ్రీవారి లడ్డూ ప్ర‌సాదం వివాదం ప్రస్తుతం దేశంలో సంచలనంగా మారిన విషయం తెలిసిందే. ఈ తిరుమల లడ్డూ కల్తీ వ్యవహారంపై కూటమి ప్రభుత్వం ఏర్పాటు చేసిన సిట్ మూడో రోజు కూడా విచారణ కొనసాగించింది. సిట్ అధికారులు ఇవాళ టీటీడీ పిండిమర, ల్యాబ్ ను పరిశీలించారు. తిరుమలలోని గోడౌన్లు, రీసెర్చ్ సెంటర్లను పరిశీలించారు. గోడౌన్లకు వచ్చిన నెయ్యి ట్యాంకర్ల నుంచి శాంపిల్స్ సేకరించారు. గోడౌన్లలో ముడిసరుకుల నాణ్యతను పరిశీలించారు.
విచారణ తొలి రోజున కీలక సమావేశం నిర్వహించిన సిట్… రెండో రోజు టీటీడీ ఈవో, ఇతర అధికారులతో సమావేశం అయింది. గుంటూరు రేంజి ఐజీ సర్వశ్రేష్ట త్రిపాఠి ఆధ్వర్యంలోని ఈ సిట్ మూడు బృందాలుగా విడిపోయి విచారణ కొనసాగిస్తోంది. లడ్డు తయారీలో పాల్గొంటున్న ఉద్యోగులను కూడా సీట్ అధికారులు విచారించనున్నారు.